Sandías

Que ninguén se estrañe se calquera día destes empeza a recibir no correo electrónico spam a ofrecer sandías por arrobas. Uns científicos da Universidade A&M de Texas concluíron que o consumo de sandías pode aumentar a libido e capacidade amatoria dunha persoa (imaxino que de varias tamén, igual é un problema de lost in translation), case talmente coma a viagra. Tampouco facía falla pensar moito, que iso xa estaba no cine na película cuxo título se traduciu como O sabor da sandía, e era por algo.
O caso é que os autores do traballo están entusiasmados ao comprobar as virtudes desta froita para o fortalecemento do corpo (sobre todo desa parte do corpo tamén). Polo visto recoméndana vivamente porque non produce efectos secundarios, cousa que non teño eu nada clara, des que unha vez na remota infancia espertei cunha furriqueira de campionato á mañá seguinte de asaltarmos a cuadrilla con nocturnidade e aleivosía un sandiar alá na miña remota Castela. Tamén agora me explico que nos dese por xogar aos médicos, así de repente, que parecía aquilo un hospital de campaña en campaña de vacinación, tantas inxeccións se puxeron. O segredo disque está no seu elevado contido en citrulina, que non me digan que non ten un nome que se presta a chanza o principio activo. A pega, que non podía faltar, é que a tal substancia se concentra na parte branca, ou sexa, arrimada á casca, o que ninguén quere... ou quería, que de agora en diante vai pasar como co xamón de jabugo, que ninguén lle quería a graxa ata que se descubriu o boa que era contra o colesterol (o malo, enténdase, que do bo ninguén ten queixa). Xa estou vendo a pregunta típica do repartidor oficial, que no das sandías, sempre hai un que corta, con grande polémica sobre o sentido en que se debe encetar, por certo:
—A ti que che dou, corazón ou casca?
—A min ponme corazón —dirán os románticos.
—A min do branco, para min do branco! —pedirán os pipelas, pura desesperación.
Teño pena das galiñas (e dos galos), que non lles vai quedar para petiscar máis ca o verde de fóra.