Transcricións

Non me gusta falar moito do choio aquí, porque non convén confundir o pracer co deber, mesmo que se confundan (hoxe estou enleada), pero velaí que recibo chamada dunha empresa de dobraxe para a que traballo transmitíndome a petición de aclaración por parte da TVG do motivo de que un personaxe dunha serie xaponesa que ando a traducir que "se chama" (pensan eles) Luffy se chame na miña tradución Ruffy. Primeiro cabréome, claro, porque a serie (que é coma unha película porno pero en violencia -ou sexa sangue e hostias sen argumento-, e sendo de debuxos animados imaxino que lla colocarán aos lindos infantes á hora do leite con cereais) ten cousas bastante peores das que preocuparse. Logo, río, porque cando quero teño moita mala baba. E porque hoxe estaba precisando unha desculpa para rir coa queixada toda arregañada. Total, que redacto a carta ás altas instancias, sen preámbulos, a matar. E non me privo de expola aquí só por me dar o gusto ou desgusto de comprobar que por moi estúpida que me sinta ás veces, sempre hai quen me gaña e gañando bastantes máis cartos ca min (será por iso).

En xaponés o personaxe chámase ルフィ. O son da primeira sílaba é un "erre" moi suave, que se pode confundir con "ele", pero non é. Por outra banda, o feito de que estea escrito en caracteres katakana e non hiragana, indica que se trata da transcrición dun nome estranxeiro, que ben pode ser Ruffy, pois o nome completo do personaxe é Ruffy D Monkey, así, tal cal, en inglés.

Consultadas as transcricións en diversos idiomas aos que se traduciu a serie, comprobei que nos da nosa contorna se transcribía maioritariamente como Ruffy (inglés, portugués, italiano, catalán, alemán) fronte ás dúas formas Luffy que atopei (castelán e francés).

E de aí elixín Ruffy. Porque tiña que elixir algo. Igual que Zoro se escribe con "Z", cando non se trata dun "Z", senón dun "S" sonoro. E poderiamos continuar así. Son cousas que pasan coas linguas. E coa ignorancia.

Atentamente